Live Show

Hindi ko mapigilan

ang ‘di mapahanga

sa make-up sa’yong mukha,

sa pag-indak ng iyong katawan,

(palapit nang palapit…)

na bumubuhay sa mga alaala

ng masayang kabataan.

Unti-unting nananariwa sa isipan

ang mga pangakong ating binitiwan

sa ilalim ng punong akasya…

mga malulutong na tawanan,

sintunadong mga kantahan

sa ilalim ng buwan…

Ikaw ang diwata

na iniluwal

ng mga kwentong pambata.

Taglay mo ang alindog

sa pagsasayaw

sa musikang nilikha

ng bawat paghinga

pag-indayog

mga hiyaw

at pagluha.

Kakaiba ang iyong angking hiwaga,

lahat nabibighani sa’yong ganda.

Kawangis mo ang isang diyosa

at ako ang iyong alipin

pilit na pinipigil ang damdamin.

Nilamon ng dilim

ikinubli ng bawat umaga

pagnanasang naglalagablab

sa’king mga mata.

Dito sa sulok, kapiling nitong serbesa;

isisilid ko sa aking gunita

ang galaw ng iyong beywang

ang paggiling ng iyong balakang

sa saliw ng awitin

na gumigising

sa pangungulilang papawiin

ng maharot na tanawin.

Dahan-dahang paghalik

at pakikipagtalik ng bote

sa nananabik kong labi.

-October 21, 2005