October Fest

Mga ilaw, usok, tugtog

Beer, pitsel, at baso

Mesa, upuan at ako.

Lahat tila magkakaugnay

Isang tagpong masaya at makulay

Para bang perpektong larawan,

nagkukubli ng katotohanan.

Isinalang ang lumang awitin

Nagbadya ang ihip ng hangin

Walang nakapansin sa mga pagbabago

Lahat abala sa paninigarilyo at pag-inom

Ngunit parang tumigil ang ikot ng mundo

Dahil sa di-inaasahang pagdating ninyo.

Napunit ang mga ulap

at bumagsak ang ulan.

Mga tao’y mabilis na nag-alisan.

Tumakbo sa mga masisilungan.

Gaya nila, sumilong kayong magkayakap

Nagdilim ang buong paligid

Naglaho kayo sa’king paningin

Nanatili ako sa’king inuupuan

habang dinadamayan

ang kalangitan sa pagluha.

-10/16/06