Hindi na mapipigil ang pandadarang
ng mga letrang uhaw sa pagnanasa.
Bakas ang panunukso
sa balangkas ng mga titik.
Nagsusumamong alayan,
kahit haplos na umit.
Unti-unti,
sila'y nag-iinit.

Ang halinghing
ng mga titik...
Nanghihimok.
Mapagpilit.
Lalansagin ang katinuan
sa bawat halik.
Unti-unti,
sila'y nag-iinit.

Ibabalot ka sa yakap
at babalabalan ng pawis.
Yayanagin ang iyong diwa
at ika'y aangkinin.
Tatakpan ang iyong mga mata.
Igagapos ang iyong mga bisig.
Unti-unti,
ika'y mag-iinit.