Mahapdi ang balat kong
Pinilit hilawin ng mga
Makabagong pananaw na
Bumibitay sa sinumang
Maihahalintulad sa kape.
O tsokolate.

Matigas at ga-buko
Ang suso kong
Tinurukan ng siyensiya
Upang paglawayan at
Pagpantasyahan ng kung
Sinu-sinong kalalakihan.

Wala ng bakas
Ng pagkapisat ang
Ilong kong ilang
Ulit na hinulma kahit na
Wala na halos matira.
At hindi na ako makahinga.

Hindi na maimpis
Ang bago kong labi na
Makapal na at maumbok.
Di mo nga lang malalaman
Kung ako'y nakangiti
O naghihimutok.

Pinahigop ko na
Ang lahat ng laman
At taba sa katawan
Kong malapit nang mabali
Dahil walang nagmamahal
Sa taong meron kang mapipisil.

Ang bagal ng teknolohiya
Dahil matagal na akong
Naghihintay kung kailan
Pwedeng palitan ang
Aking utak. Para naman
Bumagay sa bago kong katawan.